CASTRILLON. Unidá Nacionalista Asturiana aplaude la iniciativa de Castrillón de declarase “Conceyu antitaurín y amigu de los animales”
El conceyu de Castrillón ta acabante d’aprobar nel pasáu Plenu conceyil, colos votos favoratibles d’IU y del PSOE (equipu de gobiernu) y l’astención del PP, la declaración del conceyu como “antitaurín y amigu de los animales”. La moción foi presentada pola asociación defensora de los derechos de los animales ANADEL.
El voceru d’UNIDÁ NACIONALISTA ASTURIANA, Faustino Zapico, considera un fechu importante l’aprobación d’esta iniciativa, “yá que n’Asturies los festexos taurinos son dalgo aneudóticu y alloñáu dafechu de la cultura asturiana que nun tienen nengún sofitu nos ciudadanos y perviven gracies a les subvenciones de los conceyos”.
UNA camienta que la iniciativa propuesta por ANADEL tien sío un éxitu dafechu yá que la moción, arridendes de refugar los festexos taurinos y la so publicidá n’espacios públicos, tamién prohíbe l’emplegu de cualquier animal n’espectáculos, exhibiciones o esposiciones, quedando prohibíos los circos con animales.
Per otru llau, la UNA xuntu con ANADEL lleven aconceyando coles estremaes agrupaciones polítiques de la Casa conceyu de Corvera, nos meses últimos, al envís d’algamar que’l conceyu amieste la moción presentada conxuntamente por dambes dos agrupaciones. Amás ta trabayándose n’otros conceyos como ye’l casu de Mieres y Xixón pa consiguir idénticos resultaos, yá que son cásique 100 los municipios nel estáu español que se declararon yá antitaurinos y amigos de los animales, ente los que rescamplen Barcelona, Coslada o Paterna.
Esbilla
del.icio.us